根据《互联网跟帖评论服务管理规定》,网信办要求:网站不得向未实名认证的用户提供跟帖评论服务!请广大网友尽快完成实名认证,以免影响会员发帖评论等更多的会员权限。谢谢合作!
上杭网 首页 琴岗诗社 客家山歌 查看内容

客家山歌(一)

2012-3-19 16:57| 发布者: 杭网二号| 查看: 4927| 评论: 0|来自: 上杭光中轩

摘要: (1)引歌 神光山上搭歌台, 男女歌手逞歌才。 山歌好比汀江水, 源远流长滚滚来。 客家山歌特出名, 条条山歌有妹名, 条条山歌有妹份, 一条冇妹唱唔成。 客家山歌远传扬, 条条唱出情意长, 句句唱出郎心事, ...
(1)引歌   
神光山上搭歌台,
男女歌手逞歌才。
山歌好比汀江水,
源远流长滚滚来。
客家山歌特出名,
条条山歌有妹名,
条条山歌有妹份,
一条冇妹唱唔成。
客家山歌远传扬,
条条唱出情意长,
句句唱出郎心事,
声声唱出妹心肠。
山歌紧唱紧新腔,
唱出日头对月光,
唱出麒麟对狮子,
唱出金鸡对凤凰。
(2)赞美
月光冇火样柬光,
井里冇风样柬凉,
妹子今年十八岁,
身上冇花样柬香。
岭岗顶上种芙蓉,
唔曾淋水叶柬浓,
这个阿妹样柬好,
唔曾食酒面绯红。
 
妹子生得凤凰身,
眼角尖尖会割人,
好比六月狗爪豆,
唔曾浸净会魂人。
妹子生得好人才,
哪边风水管下来,
眼拐(波)打来镰刀样,
 割人心肝冇血来。
阿妹人才盖一村,
两排牙齿白如银。
讲话好比黄莺叫,
走路好比风送云。
标致妹子观音身,
尔话冇情又有情。
斜眼看人唔开口,
乌云映日热死人。
阿妹生得真真靓,
相貌又好又后生。
好比十五月光样,
哪有缺角被郎嫌。
妹子生得系苗条,
头上梳等招郎毛,
看到哥来笑一笑,
未曾开口面先烧。
阿妹生得白漂漂,
矮唔矮来高唔高。
牙齿好比高山雪,
歌声好比画眉鸟。
妹子生得静柔柔,
低头微笑半含羞。
含蕊鲜花娇又嫩,
样般怪得阿哥求。
 
人才又好又大方,
阿妹头上桂花香。
牙齿好比瓜仁样,
面貌好比观音娘。
桐树打子桐叶遮,
妹子出门凉帽遮,
风吹凉帽叶叶转,
眼线打来牡丹花。
亲哥英俊妹斯文,
两家人才盖一村,
十八铜钱两份摆,
阿哥九文妹九文(久闻)。
老妹生得真斯文,
洋毡遮卵盖一春(村),
红糟拿来煮豆腐,
又红又白得人魂。
妹子好比月鸽形,
厉害就在眼珠仁,
上上下下斜眼看,
热死几多风流人。
食尽生果唔当梨,
看尽妹子唔当尔,
赤蘖打花千百朵,
唔当蔷薇开一枝。
(3)开口难
三步行来两步停,
一心想同妹交情,
新打剪刀难开口,
六月火炉难近身。

墙内种花墙外开,
花高墙矮伸出来,
哥想上前剪一朵,
新打剪刀口难开。
 
心想上天天又高,
心想连郎面又烧,
铁打荷包难开口,
石上破鱼难落刀。
初来山上铲草皮,
唔知样般放畚箕,
阿哥同妹初相识,
唔知样般开语言?
 
阿哥人才难得有,
恰似深山红石榴,
心想同尔结相好,
未曾开口就怕羞。
门前桐树开白花,
大风吹下满地下,
妹系连郎爱开口,
莫作杨梅开暗花。
一树杨梅半树花,
哥系男人胆爱雄,
交情爱哥先开口,
女人开口面会红。
日日落雨望天晴,
新作塘头唔敢行,
单竹架桥唔敢过,
心里想尔唔敢声。
蝴蝶采花入花园,
哥想连妹先开言,
世上只有藤缠树,
唔曾见过树缠藤。
 
(4)初学恋爱
急水撑船难上滩,
初学连郎甚艰难,
心头好比擂战鼓,
面上好比火烧山。
日头一出红啾啾,
白鹤落田笃湖鳅,
湖鳅寻食唔怕死,
妹爱连郎唔怕羞。
白鹤落田脚柬长,
莫怪阿妹唔大方,
初学连郎妹冇胆,
嫩草唔曾经过霜。
妹爱连郎莫怕羞,
眉开眼笑见朋友,
交情唔单涯两个,
抬头一看天下有。
一心想同妹交情,
初学连妹还怕人,
针筒打米落镬煮,
唔知几时正上升(身)。
(5)唔知有缘么
新打茶壶七寸高,
人人都话真难挑,
人人都话真好锡(惜),
到底唔知有铅(缘)么?
新打茶壶锡捞铅,
阿哥话锡妹话铅,
阿哥话铅妹话锡,
总爱有锡也有铅。
 
兰盘石上种条桃,
唔知桃子有打么,
桃树头下遇到妹,
唔知同尔有缘么?
丝线织网丢落河,
唔知网里有鱼么?
阿哥人材妹中意,
唔知哥会想妹么?
急水打鱼尽网丢,
有鱼冇鱼也爱收,
系涯食禄天注定,
系涯姻缘前世修。
河里撒网尽力丢,
有鱼冇鱼慢慢收,
阿哥连妹心莫急,
团圆日子自然有。
 
SG6-10
(6)唔知哪个好交情
两对耳环一样重,
唔知哪对真正金,
两个阿哥一样好,
唔知哪个真正心?
两条绿竹一样长,
唔知哪条正竹娘?
两个阿妹一样好,
唔知哪个正情长?
 
三条松树透天庭,
唔知哪条落松仁(脂)?
三个阿哥柬高大,
唔知哪个好交情?
 
  三条树子般般柳(直),
唔知哪条下潮州,
三个妹子般般好,
唔知哪个情较有?
 
两个阿哥柬热人,
唔拣相貌单拣情,
打开庵门看佛面,
究竟哪个真正神(诚)?
 
上塘鱼子跳下塘,
唔知哪口水正凉?
前面柬多好妹子,
唔知哪只情正长?
 
好久唔曾搭船上,
唔知船上好风光,
柬多阿妹哥唔识,
唔知哪只好商量?
 
好久唔曾搭船下,
唔知河里柬多沙,
柬多阿哥妹唔识,
唔知开口问哪侪?
 
灯草拿来织鸡笼,
鸡爬狗蹶心就溶,
八面苏锣共下打,
唔知哪只正好铜(同)?
 
 榄子好食两头尖,
唔知落地哪头生,
老蟹两边都有脚,
唔知落地哪边行?
 
(7)求爱 
岭岗顶上种条松,
冇依冇靠样得浓,
单只筷子跌落地,
一心望妹结成双。
 
因为冇米割青禾,
因为冇船正下河,
因为冇双来连妹,
问妹有心向郎么?
 
大路荡荡好跑马,
路边井水好泡茶,
唔想细茶冲滚水,
只想同妹共一家。
 
三两猪肉四两盐,
涯今问妹咸唔咸,(行)
石膏豆腐唔放味,
涯今问妹淡唔淡?
 
唔曾相识共凳坐,
跟讲起来话头多,
门前生条拦路竹,
今番看来倒较多。
 
河边柳树叶拖拖,
妹掀衫尾郎贴坐,
阿哥问妹恋唔恋,
低头含笑肯较多。
松树打子一球球,
到处青山有水流,
到处青山有水转,
样般阿妹柬难求?
因为冇烧拆园蓠,
因为冇米剪谷枝,
因为冇糖来蘸味,
因为冇双来连尔。
石壁做屋岖对岖,
因为屋瓦盖橹箕,
因为冇床睡板凳,
因为冇双来连尔。
岭岗顶上一丘田,
冇塘冇圳靠青天,
冇娘鸡子靠白米,
单身阿哥靠娇莲。
有柬好来冇柬贤,
有柬贤来结同年,
阿哥真心来相爱,
米刷上夹就团圆。 
 
涯渴涯困涯懒声,
花边贴脚涯懒拈,
总爱妹子话一句,
上天冇路涯会行。
七月七日银溪河,
传书搭信有到么?
海水也有回头浪,
妹子有心向郎么?
 
(8)未及时
隔远看到禾表枝,
想尔救饿未及时,
只见朗花唔入米,
看尔朗花到几时。
上山唔得半山企,
只见早禾正表枝,
样得禾黄食新米,
样得同妹结夫妻。
正月做田讲落秧,
唔到夏至苗唔黄,
阿妹好比早禾谷,
节气唔来唔登场。
南蛇唔大唔过岗,
火船唔大唔出洋,
阿妹还系鱼毛柢,
唔敢同哥漂大江。
茶子打油仁唔乌,
唔贪茶油贪茶枯,
阿哥也还年纪少,
唔敢来交细阿姑。
唔到十五月唔光,
唔到夏至禾唔黄,
妹子还系年纪小,
唔敢同哥说短长。
妹子门前花未开,
尔也唔好紧缠来,
等到来年花开日,
 兜凳上棚涯冇梯。(推辞)
 
(9)失恋自慰
尔唔连涯有人连,
深山树木有藤缠,
黄蜂唔曾种花树,
满山都系拒花园。
河唇洗衫石上踞,
冇尔番碱洗茶枯,
先日冇尔也爱过,
沙煲装酒唔在壶。
连尔唔到心唔焦,
尔也唔使柬精刁,
门前种有檀香树,
唔使求尔做香包。
冇尔石炭会烧柴,
冇尔渡船会搭排,
阿哥种有梧桐树,
自有凤凰会飞来。
连尔唔到冇相干,
柬好老酒也会酸,
柬好红花也会谢,
柬好人情也会断。
 
连尔唔到冇相干,
尔比棉被冇较暖,
尔也唔系白米饭,
唔使求尔过三餐。
尔系唔肯唔求尔,
到处山岗有草皮,
手捉黄鳝砧上剐,
割断肚肠丢撇拒。
尔系爱断尽管断,
冇情阿哥冇相干,
阿妹好比大河水,
冇尔圳水唔怕旱。
(10)哥是绿叶妹是花
哥是绿叶妹是花,
哥是绫罗妹系纱,
哥是高山石岩水,
妹系山中细嫩茶。
白糖柬甜甘蔗来,
泉水柬清石缝来,
哥是白糖妹是水,
白糖见水心花开。
妹子好比蜘蛛形,
蜘蛛牵丝会缠人,
阿哥好比蝴蝶样,
被尔缠倒难脱身。
妹子好似海棠花,
海棠开在石岩下,
阿哥好比石岩水,
常年月久荫妹花。
 
阿哥一岗妹一岗,
哥系日头妹月光,
哥系日头妹晒谷,
妹系月光哥透凉。
桂树开花满园香,
菊花开在桂花旁,
哥是桂花妹是菊,
任人去讲也清香。
石头柬硬打得开,
打开石头烧石灰,
郎是石灰妹系水,
石灰见水心花开。
妹在这岗郎那岗,
妹系子鸭郎系姜,
样得子鸭同姜炒,
两人捞得共盘装。
连妹唔到发眼乌,
鸦鹊来寻山鹧鸪,
妹系鹧鸪郎系鹊,
样得行前嬲一晡。
 
妹子生得好人材,
好比月光走出来,
妹系月光哥系日,
唔知几时做一堆。
 
 妹系花瓶郎系花,
柬好花瓶爱有花,
柬好花瓶冇花插,
唔当同郎共一家。
哥系天上一条龙,
妹系地下花一丛,
龙唔翻身唔落雨,
花唔淋雨开唔红。
 
妹在这岗郎那岗,
两人热法正难当,
哥系鸡春妹鸭蛋,
样得打烂共盘装。
阿哥姓梁妹姓梁,
虽然共姓各一方,
哥系西风妹系雨,
西风透雨凉对凉(两)。

门前梨树晒花鞋,
问妹连涯唔连涯,
剪刀同布放落桌,
随尔心下去勘裁。
山歌又好声又娇,
月弦来和九龙箫,
妹子姻缘有涯份,
玉石来造洛阳桥。
 
新做大屋四四方,
做了上堂做下堂,
做了三间又两套,
问妹爱廊唔爱廊(郎)?
 
东门行出白衣庵,
又种桔子又种柑,
三皮茶叶泡碗茶,
问妹心头淡唔淡(贪)?
 
SG11-15
(11)贪嫩正来缠
山歌爱唱妹爱连,
妹系青春郎少年,
竹笋拿来做豆架,
两家贪嫩正来缠。
砍柴爱砍山布荆,
又贪好烧又贪轻,
连妹爱连年嫩女,
又贪伶俐又贪靓。
风吹竹叶皮皮青,
妹爱连郎赶后生,
过多一年老一岁,
唔比春草年年青。
十七十八正当时,
百花开早唔开迟,
竹笋出尾节节老,
今唔风流等几时。
有心连妹莫来迟,
六月禾花会过时,
禾花谢落长江水,
哥系唔留打走哩。
 
火烟相盖屋相连,
阿哥同妹上下年,
阿哥十八妹十七,
八七十五月团圆。
月子弯弯在半天,
船子弯弯在河边,
哥爱搭船赶大水,
妹爱连郎赶少年。
食肉爱食夹心靓,
连妹爱连二十零,
日里知得郎辛苦,
夜里知得郎晓冷。
(12)报家门 
一条花树路边生,
花又红来叶又青,
阿哥唔识妹名姓,
手攀花树问花名。
高山打鼓远传声,
妹子住在九龙坑,
一把长弓系涯姓,
五色祥云系涯名。
阿哥有日来上下,
直头直路转我家,
门前唔曾种有勒,
屋后唔曾裹篱笆。
妹子问涯住哪里,
家住高坑两隔离,
门前种有柿子树,
大门面向日落西。
 
麻饼好食肚里黄,
妹子住在五口塘,
阿哥住在岭颈水,
连尔唔到心唔凉。
(13)莫嫌涯
茶油煮菜莫嫌斋,
有心连妹莫嫌涯,
手指伸出有长短,
莲花出水有高低。
门前梨树晒花鞋,
妹系有心莫嫌涯,
总爱妹子有心向,
千斤担子涯会kai
别人虽嫩涯唔贪,
阿哥虽老涯唔嫌,
阿哥好比荔枝样,
虽然皮皱肉里甜。
白白嫩嫩涯唔贪,
乌乌赤赤涯唔嫌,
阿哥好比当梨样,
越乌越赤心越甜。
 
中了涯意涯唔嫌,
苦瓜腌生涯喊甜,
灯草跌落盐水钵,
入了伢心样得淡。
 
(14)唔嫌阿哥穷
妹子唔嫌阿哥穷,
阿哥好比月月红,
九冬十月霜雪过,
春水淋头叶会浓。
 
 赤米煮粥满镬红,
心愿嫁郎唔怕穷,
总爱两人情意好,
郎系讨食妹挽筒。 
 
阿哥唔系命里穷,
怨得阿哥运未通,
有朝一日时运转,
南蛇脱壳变成龙。
 
桔子好食皮鲜红,
结成相好唔怕穷,
年三十日冇米煮,
两人牵手笑融融。
 
高山点火唔怕风,
大海航行唔怕龙,
阿哥恋妹唔怕死,
妹子恋哥唔怕穷。
三间当铺涯唔爱,
情愿跟郎挑石灰,
左肩抛到右肩转,
锲牙线齿心花开。
郎心甘来妹心甘,
情意同郎睡秆棚,
情愿同郎喝粥水,
情愿同郎食糠羹。
 
(15)连妹唔使钱(对唱)
男: 
好牛食草唔使牵,
好马出阵唔使鞭,
好石磨刀唔使水,
好妹连郎唔使钱。
女: 
阿哥讲话样柬颠,
哪有连妹唔使钱,
三岁孩儿脱乳咀,
哪人带打俾尔连? 
男: 
别人打坎用田刀,
阿哥打坎用手摩,
别人连妹爱钱使,
阿哥连妹用山歌。
女: 
有好歌声冇好歌,
山歌尔莫唱柬多,
山歌唱得阿妹到,
耕田唔使用牛拖。
男: 
鸡公相打脚先来,
唔知阿妹柬爱财,
阿哥唔系摇钱树,
常年月久哪里来?
女: 
阿哥讲话样柬狂,
哪有搓饭唔使糖,
哪有喂鸡唔使米,
哪有蒸酒唔使娘(酿)?
男: 
爱银爱钱涯就冇,
阿哥还系叶下桃,
九月重阳放纸鹞,
涯今问妹高唔高(交)?
女: 
有钱有势涯唔挑,
爱哥人穷志气高,
苎麻拧线放纸鹞,
长情长线望郎高(交)
 

最新评论

广告
返回顶部

闽公网安备 35082302000101号